मिति २०८१ असार १७ गते सहकारी विकास बोर्ड द्वारा आयोजित कार्यक्रममा नेपाल कृषि सहकारी केन्द्रीय संघका महाप्रबन्धक रुद्र भट्टराईले सहकारी उद्यममा संलग्न सहकारी संस्थाहरूका चुनौती समस्या तथा समाधानका उपायहरू र सरकारद्वारा कार्यान्वयन गर्नुपर्ने नीतिगत सुधारका विषयमा कार्यपत्र प्रस्तुत गर्नुभएको छ । बोर्डका सह—अध्यक्षको अध्यक्षतामा सञ्चालित कार्यक्रमका प्रमुख अतिथि नेपाल सरकार भूमि व्यवस्था,सहकारी तथा गरिबी निवारण मन्त्री माननीय बलराम अधिकारी ज्यूले सहकारीद्वारा सञ्चालित उद्योगका समस्याप्रति सरकार पनि गम्भीर रहेको बताउनुहुँदै आवश्यक नीतिगत सुधारका लागि कार्यान्वयन योग्य सुझाव दिनुहुन अनुरोध गर्नुभएको छ । यस कार्यक्रमका विशेष अतिथि भूमि व्यवस्था, सहकारी तथा गरिबी निवारण मन्त्रालयका सचिव श्री गोकर्णमणि दुवाडीले सहकारी उद्योग सञ्चालन गर्दा आएका समस्याहरु प्रति आफू पनि जानकार रहेको बताउँदै यस कार्यक्रमबाट केही सुझावको अपेक्षा गरेको र उक्त सुझाव अनुरूप रहेका हालका ऐन तथा विधेयकमा आवश्यक संशोधन हुनेमा मन्त्रालय लागि रहेको जानकारी दिनुभयोे । साथै कार्यक्रममा सहकारी महासंघका अध्यक्ष ओमदेवी मल्ल ज्यूले विभिन्न देशले अपनाएका सहकारी उद्यमका मोडल नेपालमा पनि लागू गर्नुपर्ने आवश्यकता रहेको बताउनुभयो ।

दोस्रो कार्यपत्र केन्द्रीय नेपाल जडीबुटी सहकारी संघ लिमिटेड बाट ईश्वरीप्रसाद पाण्डेले ले प्रस्तुत गर्नुभएको थियो । त्यसपश्चात नीतिगत तथा कानुनी , संस्थागत तथा संरचनागत, व्यवस्थापकीय र प्रणालीगत समस्याका बारेमा समुहगत छलफल र छलफल मार्फत आएका समाधानका उपायहरू सरकारलाई सुझाव दिने कार्यक्रम रहेको सहकारी विकास बोर्डका सदस्य सचिवले जानकारी गराउनुभएको छ ।