साना किसानको समृद्धि कृषिको रूपान्तरण तथा उद्यमशीलताको विकास भन्ने मूल नारालाई आत्मसाथ गर्दै साना किसान कृषि सहकारी संस्था लि रघुनाथ पुरले धान प्रशोधन केन्द्र स्थापना तथा सञ्चालनमा ल्याएको छ ।

२०८० चैत्र ३ गते उक्त धान प्रशोधन केन्द्रको संघिय सरकार कृषि तथा पशु पन्छी विकास मन्त्रालयका सचिव डा.गोविन्द प्रसाद शर्मा र साना किसान विकास लघुवित्त वित्तीय संस्था तथा नेपाल कृषि सहकारी केन्द्रयि संघ लि.का अध्यक्ष श्री खेम बहादुर पाठकले उद्घाटन गर्नुभएको हो ।

करिब ३ हजार ५ सय शेयर सदस्य उपस्थित भएको सो कार्यक्रममा बोल्दै प्रमुख अतिथि श्रीमान सचिव ज्युले सहकारी क्षेत्रमा आएको विचलन र खराब अवस्थामा साना किसान कृषि सहकारी संस्थाहरूले उदाहरणीय काम गरेको र सहकारीको मर्म र भावनालाई डगमगाउन नदिएको प्रति धन्यवाद ज्ञापन गर्नुभयो ।

यसैगरी कार्यक्रममा बोल्नुहुँदै अध्यक्ष खेम बहादुर पाठकले सहकारीलाई सदस्यको संस्था बनाउन सके कुनै समस्या नआउने बताउनुभयो । उहाँले सहकारी सदस्यको हुनुपर्ने भन्दै जहाँ सदस्यको सहकारी छैन त्यहाँ समस्या रहेको स्पष्ट पार्नुभयो ।

कार्यक्रममा सबैला नगरपालिकाका नगर प्रमुख श्री कारीराम यादव, साना किसान विकास लघुवित्त वित्तीय संस्थाका नायव प्रमुख कार्यकारी अधिकृत श्री पृथ बहादुर थापा, बर्दिबासका शाखा प्रबन्धक युवराज गैरे सहित विभिन्न कार्यालय तथा संघ संस्थाका प्रतिनिधिहरुको उपस्थिति रहेको थियो ।

उक्त अवसरमा ग्रामिण उद्यम परियोजना समेत अवलोकन गरिएको थियो।